Bangladesh-ah eptu ṭangrual pawl din
Bangladesh-in kumin December thlaa inthlanpui an neih turah sorkar lai, Awami League hneh ngei tumin eptu party-ten ṭangrual pawl an din.
Eptu party-te hian hun rei tak inbiakna an neih hnuin kar kalta Inrinni khan Kamal Hossain kaihhruai ṭangrual pawl, Jatiya Oikya Front (United National Front) an din. Ṭangrual pawlah hian Prime Minister hlui Khaleda Zia-i party BNP bakah party dang pahnih an tel.
Jatiya Oikya Front hotu Kamal Hossain hi foreign minister hlui leh lawyer lar tak a ni a, kum 1971-a independence an hmuh hnuah an ram constitution duangtu a ni. Kamal chuan ṭangrual pawl din thar chuan rorellai party chu paihthlak ngei tumin a zinkawng a zawh ṭan nghal tih a sawi. Parliament dinglai chu ṭhiah a nih hunah, party zawng zawngten an pawm tlan theih tur sorkar thar a ding ngei dawn a ni, a ti.
Kamal Hossain chuan BNP chairperson Zia-i leh politics avanga tantir dangte chu chhuah nghal tura an phut thu a sawi. PM hlui Zia-i hi fahrah enkawlna tura ramdangte sum pek tichingpena puh a nih vangin thiam loh chantir a ni a, February thla aṭang khan jail-ah tantir a ni. Hetihlai hian BNP hruaitute chuan Zia-i hi a hriselna ṭha tawk lo hle chungin jail chhungah enkawlna ṭha pek a ni lo tih an sawi.
Zia-a fapa leh BNP acting chairman, Tarique Raham chu kar hmasa khan tuna prime minister ni ta, Sheik Hasina-in eptu hruaitu a nih lai kum 2004-a rally a neihnaa amah tihhlum tuma beihna tur ruahmantua puhin thiam loh chantir a ni a, damchhung tang tura hrem a ni bawk. Mahse Raham hi London-ah a awm a, Bangladesh-a kir leh hunah man nghal a ni ang.
PM Hasina-i chuan BNP nena ṭangrual pawl an din chungchangah Kamal chu na taka sawiselin, tualthattu leh thlengtlawrzuantute tana hmun siamsakah a puh. "Na tak taka ṭawngin eirukna, pawikhawihna leh sum tihchingpengte a sawisel a, tunah chuan tualthattute a thawhpui leh a. BNP leh Jamaat hi bumhmang mai an ni" a ti.
Ṭangrual pawl din thar hian an thil phut hrang hrangte an tarlang nghal a, politics vanga tangte chhuah tura an phut bakah, inthlan thianghlim leh felfai a awm theihna turin sorkar lai chu bang se an ti bawk. Hei bakah hian vote thlakna atan electronic voting machine hman an duh lo tih an sawi.
Political party tinten meeting leh rally an neih turah zalenna ang khat veka pek te, mimal newspapers, electronic leh social media te zalenna pek te an phut a, sorkar hnaa quota system leh road safety measure phuta nawrh huaihawt ṭuma zirlai mante chhuah an phut bawk. Inthlan neih tur endik turin international monitor-te an kal phalsak turin an phut bawk.