Korea ramten high-level talk nei

North Korea leh South Korea chuan nimin khan Demilitarized Zone-a Panmunjon-ah high-level talk an nei.

Nimina high-level talk neihah hian thla hmasaa South Korea President Moon Jae-in leh North Korea hotu Kim Jong-un ten Pyongyang-a meeting an neih ṭuma inremna an lo siam tawhte a taka kalpui a nih theih dan turte an ngaihtuah.

Moon leh Kim hian ram pahnihte economy lama thawhdunna siamṭhat thar leh dante an sawidun a, kawngpui leh relkawng hmanga inkalpawhna tur project siamte pawh an sawidun a ni. Korea ram pahnih sipaite thawhdunna ṭha zawk siam an duh thu pawh an sawi bawk.

Panmunjon-a nimina inbiakna neihah hian South Korea aiawhin Unification Minister Cho Myong-gyon a tel a, North Korea lam aiawhin Committee for the Peaceful Reunification of the Country (CPRC) chairman Ri Son Gwon a tel bawk.

South Korea president Moon Jae-in chu France chanchinbu-in an kawmnaah, North Korea hotu Kim Jong-un chuan an rama nuclear ralthuam tihbo a tum a intiamna chu a tih takzet tih sawiin, hemi avang hian international community chuan lawmman an pek a phu a ni, a ti. Le Figaro-in a kawmnaah Moon chuan, " Kim hi hemi chungchang hi darkar rei tak ka sawipui tawh a, ka kawmna aṭang hian nuclear ralthuam tihbo a tum thu a sawi chu a ti takzet tih ka ring nghet a ni", a ti.