Mike Pompeo-an Saudi Arabia tlawh

US Secretary of State Mike Pompeo chuan nimin khan Saudi Arabia a tlawh a, Saudi lal King Salman chu tunhnaia buaipui hlawh tak, chin hriat loha awm mek Saudi journalist Jamal Khashoggi chungchang a sawipui dawn.

Mike Pompeo hian kar hnih liamtaa Khashoggi hmuh hnuhnunna ber, Turkey-a Istanbul-a Saudi consulate pawh a tlawh dawn bawk a ni.

Turkey official-te chuan Khashoggi hi consulate-ah hian Saudi agent-ten an that niin an ring a, mahse hei hi Saudi Arabia lam chuan thu dik lo a nih thu a sawi thung.

US President chuan hun rei tak chin hriat loha Khashoggi a awm chungchangah tualthattute an inrawlh ngei a rin thu a sawi. Hemi rual hian a thusawi finfiahna tur erawh engmah a nei lo. Saudi lal nena telephone-a an inbiaknaah Khashoggi chungchang hi hriat a neih loh thu King Salman chuan a hrilh niin a sawi bawk.

Thawhlehni khan Turkey police-te chuan Saudi consulate hi an dap a, hei hi Khashoggi chin hriat loha awm hnuah consulate-a luh phalsak an nihna hmasa ber a ni. Turkey security te hian cosulate chhungah Khashoggi hi thah a ni ngei tih finfiahna audio leh video an nei niin an sawi.

Saudi lal King Salman chuan Saudi Arabia mi Khashoggi chunga thil thleng hi hriat a nei lo tih sawiin, Turkey nen a chin hriat tuma thawhdun an remti niin a sawi. King Salman hian Khashoggi chungchang chhui tur hian Thawhṭanni khan thupek a tichhuak tawh a ni.

Saudi Arabia sorkar kalphung sawisel ṭhintu, Khashoggi hi October 2-a Istanbul-a Saudi consulate-a a kal hmuh a nih hnuah a chin hriat zui a ni tawh lo. Tukey lam consulate chhungah mi 15 awmna Saudi agent team-ten an lo that niin a sawi a, mahse Saudi Arabia chuan consulate aṭang hian him taka a chhuah thu a sawi thung.