Facebook in Myanmar sipai nena inzawmna nei account tihtawpsak

Facebook chuan Myanmar sipai nena inzawmna nei account 10 leh page 13 a tihtawpsak tih a sawi.

Account leh page tihtawpte chu Rohingya Muslim-te laka Myanmar sipaiten beihpui an thlak chungchangah sipai thuken puanzarna atana hman an ni tih a sawi. Thuchhuah an siamah Facebook chuan Myanmar ramah thu dik lo puanzarna atana Facebook hman theih loh tura siam an duh thu te sawiin, hetiang lo hmang ṭhinte chu chhuizui leh an chunga action lak zel an tum tih a sawi.

Myanmar sipaite hi Rohingya mite laka beihpui an thlak chungchangah an ram mipuite thlawpna an hmuh theihna atana information dik tawk lo hmanga campaign ṭhinah puh an ni. Kumin kumtir lam khan Facebook aiawh pakhat chuan an chhui chiannaah Rohingya te chungchang thu dik lo puanzarna atana account siam eng emaw zat hmuhchhuah a nih thu a lo sawi tawh a ni. August thla khan Facebook hian page 52 leh account 18 a lo titawp tawh bawk a, heng zingah hian sipai hotu lu Senior General Min Aung Hlaing-a account pawh a tel.