Korea ramten kawngpui leh rel kawng inpawhtir leh remti

North Korea leh South Korea ramten Thawhṭanni-a high-level meeting an neihah, an kawngpui leh relkawngte chu a hma thei ang bera inpawh tir leh an remti.

Thawhṭanni-a Demilitarized Zone-a Panmunjom khuaa SKorea unification minister Cho Myoung-gyon leh NKorea Committee for the Peaceful Reunification of the Country (CPRC) chairman Ri Son Gwon ten meeting an neihnaah inremna hi an siam a ni.

Kum 1952-a Korean War a tawp hnu khan Korea ram pahnihte hian civil mite inkalpawhna leh inbiakpawhna te an titawp vek a ni. An kawngpui leh relkawngte inpawh tir leh hi remti mah se, hna thawh ṭan hun tur erawh an sawilang lo.

Official-te chuan ramri-a sipaite inepna boruak siamṭha tura sipai aiawhte inbiakna pawh a rang thei ang bera neih an rel bawk. He hunah hian indona avanga chhungkua inṭhendarhte inhmuhkhawmna hun buatsaih tur chungchang pawh an rel nghal ang. Hei bakah hian 2032 Olympics thlen ṭawm dil an tum chungchang pawh a hrana ngaihtuah a ni leh dawn bawk.