Pak PM-in China a tlawh dawn

Pakistan Prime Minister thar Imran Khan chu November 2 hian ni thum cham turin China-ah a zin dawn a, China President Xi Jinping bakah hruaitu dangte hmuin, defence lama thawhdunna ṭha zawk siam dan turte a sawipui ang. Hei bakah hian China-Pakistan Economic Corridor projects chungchang a sawipui dawn bawk a ni.

Imran Khan hi August thla khan Pakistan PM atan lakluh a ni a, PM a nih hnuah China hi ram pawn lama a zinchhuah ṭum thumna tur a ni. Thla hmasa khan Saudi Arabia leh United Arab Emirates ramte a lo tlawh tawh a ni. China-a a cham chhung hian Shanghai-a Chinese International Import Expo 2018 neih turah a tel nghal ang.

Hetihlai hian sum lama harsatna nasa tak tawk mek, Pakistan khaichhuah dan ngaihtuah turin International Monetary Fund (IMF) aiawh chuan November 7 hian Pakistan a tlawh dawn.