Russia-in Ukraine a run dawn loh chuan Biden-a'n Putin nena inbiak a remti

US president Joe Biden chuan Russia-i'n Ukraine a run dawn loh chuan Russia president Vladimir Putin nen inbiakna neih chu a thuphungin a remti tih White House chuan a sawi.

France president Emmanuel Macron chuan kum tam tak hnua Europe buaina lian ber zinga mi thleng mek boruak tudai tur hian hma a la a, US leh Russia hruaitute pawh boruak ṭha siam tura inbe tur hian a ngen a ni.

US chuan Russia-in Ukraine a run lui a nih chuan Russia laka hrekna lian tak siamah a vau chhunzawm reng bawk. Hetih lai hian Russia chuan Ukrraine run tumna a neih loh thu a sawi ve reng bawk a ni.

White House press secretary Jen Psaki chuan, "President-in chiang taka a lo sawi tawh angin, inrunna a thlen hmain palaite inbiakna nei turin kan inhawng reng a ni," a ti.

Psaki chuan Russia-in tunkar tawp lam hian US secretary of state Antony Blinken leh Russia foreign minister Sergey Lavrov-te chu Europe-ah inhmuh an tum tih a sawi bawk. "A thuphungin President Biden chuan he meeting zawh hnuah President Putin nena inbiakna neih chu a remti a ni," tiin Pathianni khan Biden hian France President Macron pawh a bia a, Ukraine ramria Russia sipaite inkulh mekte dan chah an nih dan turte leh, inbiakna neih mek a nih dante an sawidun.

US leh khawthlang ram dangte chuan Ukraine ramri lamah Russia sipai 1,50,000 chuang an awm tawh thu leh thapui hmanga luhchilh an inpeih reng tawh tih an sawi. US company Maxar chuan satellite imagery thar aṭangin ralthuam bakah sipai pawh an hmuh belh leh niin a sawi.

Mahse Russia chuan a ṭhenawm ram hi run tumna a nei lo tih a sawi a, hmei rual hian Ukraine-in NATO member nih a dilna chu hnawlsak an phut thu leh, Cold War hnua Europe khawchhak lama khawthlang ram sipai dahte lakchhuah an phut thu a sawi.

Pathianni khan France President Macron chuan Putin pawh inbiakna a neihpui bawk. Hei hi Ukraine chungchanga boruak ṭha lo a awm chhoh hnuah an inbiak ṭum hnihna niin, darkar khat vel an inkawm a ni. Macron leh Putin-te hi an inbiak ṭum khatnaah minute 105 zeta rei an lo inkawm tawh bawk a, hemi ṭum hian Putin chuan buaina sosan chhohna chhan chu Ukraine security force-te chet dan dik lo vang niin a sawi. Pathiannia zana an inbiak zawh hnu lawkah hian US leh Russia president-ten summit an neih tur hi puan nghal a ni.

Macron hian Ukraine president Volodymyr Zelenskhyu pawh a be bawk. Zelenskhu hian inkahhai puan a, inbiakna kalpui chhunzawm turin a ngen a ni.

President Biden-a'n Russia President nena inbiakna neih remti a, inbiakna hmanga chinfel dan kawng a la ngaihtuah chu UK prime minister Boris Johnson chuan lawmawm a tih thu a sawi. Hemi rual hian President Putin chu Ukraine ramria a sipai dahte hnukkir a, a vaunate titawp turin a phut nghal bawk.