Myanmar sipai sorkarin ICJ-a an ram aiawhtu Suu Kyi-i a thlak

Myanmar sipai sorkar chuan UN top court, International Court of Justice-a Rohingya Muslim-te beih chungchang thubuaia an ram aiawhtu, Aung San Su Kyi chu a thlak.

Kum 2019, December thla khan The Hague-a ICJ-ah hian he thubuai hi ngaihtuah ṭan a ni a, Myanmar ram aiawhte hi Suu Kyi hian a ho a ni. Mahse nimina virtual hmanga thubuai ngaihtuah chhunzawmnaah, Myanmar aiawhte hi international cooperation ministry Ko Ko Hlaing leh attorney general Thida Oo-ten an ho tawh a ni. An pahnih hian Myanmar civil sorkar paihthlak chungchanga US-in a hrek mek zingah an tel.

Kum 2017-a Myanmar sipaiten Rakhine state-a Rohingya Muslim-te laka beihpui an thlak avanga mi tam tak an thih phah a, mi nuai tel ram danga an tlanchhiat a ngaih phah chungchangah Gambia chuan ICJ-ah hian Myanmar lakah hian thubuai a thehlut a ni. ICJ hi Indopui II hnua UN member ramte inkara buaina chinfelna tur ngaihtuahna atana din a ni.

Rohingya-te beih an nih hi Myanmar-a civil sorkarin thuneihna a chan laia thleng a ni a, hei vang hian Suu Kyi-i pawhin an sipaite chet danah an thlavang hauhin court-ah hian an ram aiawhte an ho a ni. Mahse nikum February 1-a sipaiten civil sorkar thuneihna an hnehchhuh hnuah, Suu Kyi-i pawh hi pawn chhuak thei loin hren zui a ni a, thubuai eng emaw zat sipaite hian an siamsak tawh bawk.