Trump-an Honduras ṭanpuina pek tihtawpah vau

US President Donald Trump chuan Honduras aṭanga US-a pemluh tum mi tam takin US border an pan avangin Honduras ram ṭanpuina an pek ṭhin chu tihtawpah a vau.

President Trump hian hemi chungchang hi Thawhlehni khan a twitter-ah tarlangin, Honduras president hnenah an ram aṭanga US pana kalte chu an lo dan a, an hruaikir lo a nih chuan ṭanpuina sum an pek ṭhin chu an titawp dawn tih a hrilh niin a sawi.

Honduras aṭanga US-a pemluh tuma US ramri lam pana a ruala kal hi mi 1,500 vel an tling tawh a ni.

President Trump-an a twitter-a a ziahlan hnu hian US-a pemluh tuma a ruala kalte huaihawttu zinga mi leh Honduran legislator hlui chu Guatemala thuneituten manin, Honduras lamah an thawnkir leh nghal a ni. President Trump hian pemlutte avang hian kumin April thla khan Honduras ram hi a lo vau tawh bawk.

Kar hmasa khan Vice President Mike Pence chuan central America ramte chu a huhoa pemluh tuma kal ṭhinte dang tura chak zawka hma la turin a lo ngen tawh a ni. Pence chuan dan loa US luh tuma zinkawng hlauhawm tak zawh lo tura an ram mite hrilh turin a ngen.

US hian kumin kumtir lam khan Honduras aṭanga US-a pem mi sang telte hnena protected status pek chu kum 2020 ah tihtawp a ni dawn tih a lo sawi tawh bawk.

Kum 2016 leh 2017 khan US hian Honduras ram ṭanpuina atan dollar maktaduai 175 a pe niin US Agency for International Development chuan a tarlang.

Honduras hi ram rethei leh eiruk hluarna ram a ni a, khawvel ram zingah tualthah thlen tamna ber zingah a tel a ni. World Bank-in a tarlan danin an ram mipui 60% chuang hi mi rethei an ni.