Brazil president eiru-ah puh

Brazl Federal Police chuan an ram President Michel Temer chu eiru leh, dik lo taka sum chheprelh leh thil dik lo tih tumah a puh.

Report an tihchhuahah Federal Police chuan thil dik lo tia president an puhna hi finfiahna ṭha tawk a awm nia sawiin, president thil neihte chu khawih chet theih loha hreksak turin an ngen nghal bawk.

President Temer bakah midang 10 te thil neih pawh khawih chet theih loha hrek tur hian an ngen bawk a, an zingah hian President fanu Maristela leh a ṭhian hnai tak Colonel Joao Baptista Lima Filho te pawh an tel.

He puhna hi Chief Prosecution Office-ah thehluh a ni a, anni hian ni 15 chhungin president puhna hi ngaithuah a nih dawn leh dawn loh a tichiang ang. Prosecution office hian Supreme Court-ah thlen a remtih chuan, President puhna thubuai hi kalpui zel a nih theih nan Federal Assembly phalna lak a ngai leh dawn a ni.

Federal Police-te tarlan danin, President hian dik lo taka hamṭhatna a hmuh theihna turin port sector kaihhruaina dan thlak danglamna thupek a tichhuak niin a sawi. Port-te concession pek theih chin chu kum 25 aṭangin kum 35-ah a sawnhla a ni. Hetihlai hian President office lam chuan police report chungchang hi hriattir an la ni ve lo tih a sawi thung.