Russia-Pakistanin military drill nei dawn

Russia leh Pakistan sipaite chuan October 21 aṭanga November 4 chhung hian Pakistan-a Khyber-Pakhtunkhwa province-ah military drill an nei dawn.

Military drill neih tur hi 'Friendship 2018' tih vuahin, Pabbi khuaa National Counter-Terrorist Center-a training range-ah neih a ni ang. He hunah hian Karachay-Cherkessia aṭangin mountain shooter 70 chuang an tel dawn niin Russian Southern Military District hotu Vadim Astafyev chuan a sawi.

Ram pahnih sipaite hian kum 2016 aṭang khan 'Frienship' drill hi an nei ṭhin a, nikum khan North Caucasus-ah neiin sipai 200 chuang an tel. Pakistan hian Russia nena sipaite thawhdunna ṭha zawk siam a duh tih a lo tilang tawh a, August thla khan Pakistan leh Russia hian Russia military training institute-a Pakistan sipaite an training phalsakna turin inremna an lo ziak tawh a ni. He inremna hi Russia Deputy Defence Minister Colonel General Alexander Fomin-an Russia-Pakistan Joint Military Consultative Committee (JMCC) meeting nei tura Islamabad a tlawh ṭumin ziah a ni.