Russia-in Ukraine khawchhak lamah sipai tir lut

Russia president Vladimir Putin chuan Ukraine khawchhak lama helpawl thunun bial pahnih, Donetsk People's Republic leh Lugansk People's Republic-te chu independent state-ah a pawm hnuin Russia sipaite a tir lut nghal.

Russia chuan Ukraine aṭanga inlakhran duh pawlte hi kum 2014 aṭang khan a lo thlawp tawh a ni. Sipai a tirhluhte hi muanna siamtu tur, 'peackeeper' anih tur thu a sawi. Mahse US chuan hei hi thil awihawm lo tak a nih thu a sawi ve nghal a, Russia chu indo chhuah theihna tur boruak siamah a puh a ni.

Ukraine president Volodymyr Zelensky chuan Russia-in an ram khawchhak lama sipai a tirh luh hnua Thawhlehni zana ram mipuite hnena thuchah a sawiah, an ram chuan an hlau lo tih a sawi. Hemi rual hian an thawhpui ram dangte chu an ram thlawpna lantir turin a sawm nghal bawk.

President Zelenksky chuan, "Tunge kan ṭhian dik tak leh kan thawhpui dik tak tih te, ṭawngkam chauha Russia vau tum tihte hriat a pawimawh ta hle a ni," a ti.

Russia-in chet a lak thar leh avang hian US, UK bakah ram dang eng emaw zat chuan a chhan letna atan Russia ram hrekna an siam thar ngei rin a ni. UK health secretary Sajid Javid chuan Russia chuan Ukraine a run ṭan ta nia sawiin, Ukraine chungchanga buaina chu inbiakna hmanga chinfel an thlang reng a, mahse President Putin-a chet dan chuan inbiakna aiin inbeihna chu a thlang ta zawk nia a lan thu a sawi.

Japan pawhin US leh G7 ram dangten Russia an hrek dawn chuan a zawm ve nghal dawn tih a sawi. Japan prime minister Fumio Kishida chuan President Putin-a'n Ukraine khawchhak lama sipai a tirh belh leh chu pawmzam mai chi a ni lo a, international law bawhchhiatna lian tak a ni, a ti.