Taliban-in Afghanistan 'grand army' din dawn

Afghanistan-a Taliban sorkar chuan an ram sipai, 'grand army' a din dawn a, hetah hian sorkar hmasa hnuaia sipai lo ṭang tawhte pawh telh vek an ni dawn tih official chuan a sawi.

Taliban sorkara Ranks Clearance Commission hotu Latifullah Hakimi chuan nikuma US sipaite an inlakchhuah dawna helicopter leh thlawhtheihna, hman theih loh tura khawiha an hnutchhiah 81-te chu an siamṭha tawh niin an sawi. Hei bakah hian Taliban-ten thuneihna an chan khan light arm 3,00,000 chuang, heavy weapons 26,000 leh military vehicles 61,000 chu an kutah a awm tih a sawi bawk.

Nikum August 31-a US sipaite an chhuah fel hma lawk aṭang khan Afghanistan armed force-te chu an tluchhe tawh a, an base-te an rauhsan bakah an ralthuam leh motorte pawh an hnutchhiah vek a, hei hi Taliban-te kutah an lut nghal a ni.

Taliban hian sorkar hmasa nena inkungkaihna nei zawng zawngte pawh ngaihdam vek an intiam thu sawi mah se, thuneihna an chan hnua an ram chhuahsantu, mi 1,20,000 chuang zingah hian sorkar hmasaa official leh sipai hotu tam tak an tel. A chambang tam tak pawh an nihna anga awm zui tawh loin, civil mi angin an khawsa a, hremna an tawh lohna turin inthup takin an awm zui a ni. United Nations chuan sorkar hmasa hnuaia armed force nena inzawmna nei mi 100 chuang chu Taliban sorkar hnuah thah an ni tawh tih January thla khan a sawi.

Hetih lai hian Hakimi chuan Taliban-in ngaihdamna a lo puan tawh chuan a thawk ṭha hle tih a sawi thung a, "Ngaihdam an nih thu hi chhuah lo ila chuan boruak chhe tak a thleng ngei ang," tiin "Thihchilh bomb hmanga mi umzuitute kha tunah chuan amah venghimtu an ni tawh," a ti.

Taliban hian sorkar hmasa hnuaia sipaite an rank ngaiah a dah dawn leh dawn loh tihchianna awm lo mah se, kar liam ta khan Afghan National Army officer hlui pahnihte chu defence ministry-a top post-ah a dah. An pahnih hian specialist surgeon niin, sipai hospital pui berah a dah a ni.

Hakimi chuan 'grand army' dinna tur hian an thawk mek tih sawiin, sorkar hmasaa security sector-a pilot, engineer, service person, logistical leh administrative staff-te chu an dinhmun ngaiah dah an ni ang, a ti. Sipai an din thar tur chu an ramin a enkawl zawh tawk tur a ni dawn tih a sawi bawk.

US-in Aghanistan-in ram pawna a sum neih, USD tluklehdingaw 7 chu khawih chet theih loha a hrek sak mek avangin Afghanistan hi sum lamah nasa takin a tluchhe mek a ni. US chuan a sum hrek sak zinga a zahve chu September 11,2001-a World Trade Centre beihnaa thi chhungte zangnadawmna atan dah a ni dawn a, a zahve dang chu humanitarian aid fund atan a pe chhuak dawn tih a sawi.