Myanmar sipaite'n civil mite beih nan Russia leh China siam ralthuam hmang

United Nations human rights expert-te chuan Myanmar sipaiten civil mite an beihna turin China leh Russia chuan fighter jet a pe niin an sawi a, UN Security Council hnenah Myanmar-in ralthuam a lakluhte chu dan sak turin an ngen.

Nikum February 1-a Myanmar sipaiten civil sorkar thuneihna an hnehchhuh hnua Myanmar sipaite hnena ralthuam supply-tu zingah Russia leh China bakah Serbia pawh a tel niin US Congressman hlui Thomas Andrews chuan a sawi. Heng ralthuam an thawn luhte hi civil mite beihna atana hman a ni ngei tih pawh an hrechiang tih a sawi bawk.

Myamnar sipaiten thuneihna an chan hnua an ram chhunga buaina chhuakah civil mi 1,500 chuang chu sipaite kut tuar hian an thi tawh a, thingtlang lama sipai leh helpawlte inbeihna vangin mi nuai thum chuang chu himna zawngin an tlanchhe tawh bawk a ni. Hetih lai hian sipaite hian sipai sorkar duhlotute chu firfiak tiin a puh thung a, an ramchhung buainaa UN inrawlh tura ngenna chu an dodal bawk.

Report chuan Russia hian drone, fighter jet chi hnih, armoured vehicle leh air defence system-te Myanmar sipaite tan hian a supply a, China hian fighter jet pein, Serbia hian rocket leh artillery shell-te a thawn lut bawk a ni.