Dan loa US-a lutte thawnkir zel an ni ang : Donald Trump

US President Donald Trump chuan dan loa US-a lutte chu man zel an nih bakah, an ramah thawnkir zel an nih tur thu a sawi.

Hetih lai hian Honduras aṭanga US-a pemluh tumin a huhoin mi 1600 vel chuan Guatemala kaltlangin US hi an pan mek nia sawi a ni. Heng mite hi Honduras-a San Pedero Sula khua aṭangin kar kalta Inrinni khan an chhuak a, Thawhṭanni khan Guatemala an thleng tawh. US chuan heng mite hi dang a, an rama hruai let vek turin Honduras chu a hrilh a, a dang lo a nih chuan Honduras ram ṭanpuina a pek ṭhin pawh tihtawpah a vau tawh a ni.

Thawhlehni khan Guatemala chuan US-a pemluh tuma kalte buaipuitu zinga pakhat chu manin Honduras-ah a thawn kir tawh a, mahse midangte erawh chuan Guatemala hi an paltlang hman tawh a ni.

President Trump chuan central America ram pathum - Hondruas, Guatemala leh El Salvador ramte chuan mi leh state dan loa ramri kana US-a an luhtir a nih chuan, an man an tel ngei dawn tiin a twitter-ah a tarlang.

Vice President Mike Pence pawhin Honduras President Juan Orlando Hernandez leh Guatemala President Jimmy Morales-te pawh telephone-a a biak thu a sawi.