Postal treaty aṭangin US inhnuhdawh tum

US chuan kum 144 zet hman tawh, postal treaty aṭanga inhnuhdawh a tum thu a sawi.

United Nations chuan ram ṭhenkhat aṭanga thil thawnluhah international rate tlawm zawka siamna turin he treaty hi a siam a, hei hi a bikin ram rethei zawkte puihna tura a tih a ni. Mahse US chuan discount siam chu American sumdawngte tan hlohna a ni tiin a sawi.

Official-te chuan postal treaty aṭanga inhnuhdawh an tum thu an sawi hian inremna ṭha zawk siamna tur kawng a hawn ngei an beisei thu an sawi.

International mailing rate hi UN unit, Universal Postal Union (UPU) kuta awm a ni a, kum 1870 vel aṭangin bul an ṭan a ni. Developing country aṭanga thil thawnna man a tihhniam laiin, ram hausa zawkte tan erawh rate a tisang thung.

White House chuan he system chhawr bertu chu China a ni tih sawiin, ram hrang hrangten parcel an thawnchhuah kg 2 chinah an mahnia rate an siamna tura he postal treaty hi thlak danglam a duh a ni. Kg 2 chunglamah chuan rate hi an insiam thei a ni. Khawvel pum huapa online shopping a lar chhoh zel avangin postal system hmanga parcel, kg 2 hnuailam thawnchhuah hi a tam chho hle a ni.

US chuan postal rate hi siamṭhat a tum a, hei hi thla ruk chhunga hman theih tura peih a tum a ni. He rate a siamtharah hian China aṭanga parcel thawnluh man chu 40% aṭangin 70% velah a kaichho dawn niin official-te'n an sawi.