Jamal Khashoggi case : US-in Turkey hnenah finfiahna dil
US chuan Istanbul-a Saudi Consulate-ah Saudi journalist thah nia sawi chungchangah Turkey chu recording evidence pe turin a ngen.
Saudi sorkar kalphung sawisel ṭhintu, journalist Jamal Khashoggi chu October 2-a Istanbul-a Saudi consulate-a a kal hnuah a chin hriat lohin a awm zui a, Turkey chuan consulate-ah hian Saudi agent-ten an lo that niin a sawi a, an that ngei an ni tih audio leh video evidence pawh a nei niin a sawi. Mahse hei hi Saudi Arabia chuan a pha thung.
Washington Post chuan Khashoggi-a'n a bo hma-a a thuziah hnuhnung ber chu a tihchuak a, hetah hian Middle East-a chanchinbu miten zalenna an neih a pawimawh zia a ziak a ni. Khashoggi thuziah an tihchhuah tlai chhan sawiin, Global Opinoins editor Karen Attiah chuan Khashoggi hi him taka a rawn kir leh an beisei vang niin a sawi a, "Mahse hei hi a thleng ngai dawn lo tih kan pawm a ngai ta a ni", a ti.
Turkish investigator-te chuan Khashoggi chungchang an chhuinaah thah a ni ngei tih finfiahna audio evidence an nei tih an sawi a, he audio-ah hian consul Mohammed al-Otaibi ṭawng ri pawh a hriat a ni a, Khashoggi that tura Istanbul-a tirh Saudi agent-te hnenah consulate pawn lamah ti zawk tura a hrilh ri a hriat theih nia tarlan a ni.
Nilaini khan Turkish investi-gator-te chuan Saudi consul hi darkar kua chhung vel dapin an enfiah a ni. An zingah hian prosecutor leh forensic expert-te pawh an tel.
US Secretary of State Mike Pompeo pawhin Thawhlehni khan Saudi lal King Salman leh Crown Prince Mohammed bin Salman-te hmuin, Khashoggi chungchang hi a sawipui a, mahse Saudi lam chuan he thila Saudi Arabia inhnamhnawiha puhna chu an pha a ni. Pompeo hian a hnuah Turkey President Recep Tayyip Erdogan pawh a hmu leh bawk.
Khashoggi hi US resident niin, Washington Post newspaper-a columnist a ni. Saudi crown prince policy sawiselna te ziah avangin nikum khan Saudi official-te chuan an vau a, hei vang hian nikum khan Saudi Araba ram aṭang hian a tlanchhia a ni. October 2 khan Tukish mi, a nupui hual nena an inneihna tur atana document pawimawhte lak turin Saudi consulate-ah hian a kal a ni. Hemi hnu hian a chin hi hriat zui a ni ta lo a ni.