Ecuador-in Venezuela ambassador hnawtchhuak

Ecuador sorkar chuan an rama Venezuela palai, Carol Delgado chu Venezuela Communications Minister Jorge Rodriquez-an Ecuador Preident Lenin Moreno sawiselna thu a sawi avangin an ram aṭangin a hnawtchhuak.

Ministry of Foreign Affairs chuan Ecuador thuneitute zah lohna lantirna chu an ngaizam mai dawn lo tih sawiin, Venezuela minister thusawi danah an lawm lo hle tih a sawi a, hei vang hian Venezuela palai chu an hnawtchhuak tih a sawi. Hemi rual hian an ram chhunga Venezuela mi awmte chu an puih chhunzawm zel dawn a, an dikna chanvo pawh humhalh sak zel an ni ang, a ti.

Venezuela minister Rodriguez hian September 25-a UN General Assembly-a thu a sawiah, Ecuador President Moreno-an Venezuela mi, an rama sum leh ei leh in lama harsa nasa tak thleng mek vanga pemchhuak zat chungchang a sawi chu a dik tawk lo nia sawiin, Ecuador president chu dawt sawiah a puh a ni. Ecuador President hian kum hnih kalta chhung khan mi 60,000 chuang zetin Venezuela hi an chhuahsan niin a sawi a ni.

Kum 2015 aṭang khan Venezuela ramin sum lama harsatna nasa tak a tawh chhoh avangin an ram mi tam tak chu ramdangah an pem chhuak a, UN chuan Venezuela mi pemchhuak hi mi maktaduai 1.9 an tling tawh niin a sawi.