Malaysia deputy PM hlui thubuai 45 siamsak

Malaysia Deputy Prime Minister hlui Ahmad Zahid Hamidi chu thubuai 45 siamsak a ni a, heng zingah hian eirua puhna leh a sum lakluhna zepa puhna te pawh a tel.

Zahid hi Ningani khan Malaysian Anti-Corruption Commission (MACC) chuan Kuala Lumpur-a an headquarters-ah koin an hreng zui nghal a ni.

Nimin khan kum 65 mi, Zahid hi court-ah inlanin, an puhna hrang hrangte hi thu dik lo niin a sawi. Court chuan Zahid hi an ram pawisa ringgit maktaduai 2 dahkham a bail-a chhuah a phalsak a, mahse Malaysia ram chhuahsan khapsakin a passport thehlut turin a ti bawk.

Zahid-a hi eptu pawl United Malaysia National Organisation (UMNO) president nilai a ni a, nimina court-a hruai a nih pawh hian an party mi leh sa eng emaw zat an pungkhawm a ni. UMNO chuan an party hotu puhna te chu thu dik lo a nih thu sawiin, man a nih ni chu Malaysia tana ni lungchhiatthlak tak a ni, a ti.

Malaysia Prime Minister hlui Najib leh a nupui Rosmah Mansor chu sorkar sum tam tham tak tichingpena puhin thubuai siamsak an ni tawh bawk.