Abe-an Russia-Japan peace treaty rawtna a hnawl

Japan Prime Minister Shinzo Abe chuan Russia nena inremna an siam tur chu territorial issue chungchanga thu delhkilh a awm phawt loh chuan a ziak duh lo niin Russia President Vladimir Putin chuan a sawi.

Putin hian thla hmasa khan Shinzo Abe chu treaty hi sign phawt tura ngenin, territorial issue chungchang hi a hnua chinfel dan an ngaihtuah tur thu a sawi a ni. Mahse Japan PM hian hei hi pawm loin, territorial issue chu chinfel phawt a phut thung.

Russia leh Japan hian Indopui II hnuah peace treaty hi an la ziak lo a, Pacific island pali chu neitu zawk nih an inchuh reng a ni. Hei hi Russia-ah chuan Southern Kurils tih a ni a, Japan-ah Northern Territories an ti thung a ni. Kum 2017 September thla khan Putin leh Abe chuan an thliarkar inchuhah hian joint economic activity kalpui an lo remti tawh a, hei bakah hian agriculture, electricity, greenhouse facility, garbage disposal leh tourism lama project siamte an remti bawk.