Saudi Arabia-in journalist Khashoggi thih thu a puang ; Saudi insawifiah danah Trump a lungawi lo
Hun rei tak chin hriat loha a awm hnuah, Saudi journalist Jamal Khashoggi chu Istanbul-a Saudi consulate chhunga insualbuaina thlengah a thi niin Saudi Arabia chuan a sawi. Hei hi Saudi Arabia-in Khashoggi a thi tih a sawichhuahna hmasa ber a ni. Khashoggi thah a nih avang hian consulate-a senior official pahnih pawh ban an ni tawh niin a sawi.
Saudi Arabia sorkar kal-phung sawisel ṭhintu, journalist Khashoggi hi October 2-a Istanbul, Turkey-a Saudi consulate-ah a nupui neihna tura lehkha pawimawh lama a kal chu a chin hriat zui a ni lo a, consulate aṭanga a chhuak lam hmuh tur a awm tawh lo niin Turkey thuneitute chuan an sawi. Turkey chuan Khashoggi hi consulate chhungah Saudi Arabia sorkarin a tirh, Saudi agent-ten an that niin a sawi a, mahse he puhna hi Saudi lam chuan a pha reng a, consulate
aṭangin Khashoggi hi him takin a chhuak niin a sawi a ni.
Saudi Arabia chuan hun rei tak Khashoggi chungchang hriat a neih loh thu a sawi hnuah, kar kalta Zirtawpni khan cosulate chhunga buaina chhuakah Khashoggi a thih thu hi a sawi ta a ni. Mahse a thih dan chungchang a sawidan hian sawizui a hlawh hle a, US President Donald Trump pawhin Saudi Arabia insawifiah danah a lungawi tawk lo hle tih a sawi.
President Trump chuan thu dik tak an hriatchian hma chuan a lungawi dawn lo tih sawiin, Saudia Arabia ram hrekna pawh kalpui theih reng a la ni tih a sawi. Saudi Arabia nena ralthuam leina tura inremna an lo siam tawh chu an tihtawp chuan US aiin Saudi chuan a tuar nasa zawk dawn a ni, a ti. Hemi rual hian Khashoggi thah a nih chungchang chu Saudi Crown Prince Mohammed bin Salman chuan a hre lo ve thei tih a sawi bawk.
Germany Chancellor Angela Merkel pawhin Khashoggi thih dan sawifiahna chu a chiang tawk lo tih a sawi a, France Foreign Minister Jean-Yves Le Drian pawhin Khashoggi chungchanga zawhna tam tak chu chhan lohin a la awm a ni, a ti. EU leh UN pawhin uluk taka Saudi journalist thih dan hi chhui chian an phut thu an sawi bawk.