INF Treaty aṭangin US inhnukdawk dawn

US President Donald Trump chuan Russia, Soviet Union an nih lai kum 1987-a inremna an lo siam tawh, Intermediate-Range Nuclear Forces (INF) Treaty aṭangin US a inhnukdawk dawn tih a sawi.

US leh Russia hian ralthuam siamna tura bithliah chin siamna turin he inremna hi kum 1987 khan an siam a, inremna hi Soviet leader Michael Gorbachev leh he tih laia US President Ronald Reagan ten an ziak a ni. Inremna hmang hian ram pahnihte chu an missile neihte inenfiah sak tawn remtih a ni a, kum 1991 khan missile 2,700 dawn chu tihchhiat a lo ni tawh a ni.

Mahse US President Donald Trump chuan kar kalta Inrinni-a Nevada state-a rally a neih hnua reporter-te a kawmaah he inremna hi Russia chuan kum tam tak a lo bawhchhe tawh niin a sawi a, mahse an bawhchhiat dan erawh a sawichiang lo thung.

Inrinni vek khan Trump-a National Security Adviser John Bolton chuan Russia hi a pan a, Russia hruaitute hnenah inremna an siam aṭanga inhnuhdawh an tum thu hi a hrilh dawn a ni.

INF treaty an ziah hnuaiah hian Russia leh US chuan ground-launched missile leh cruise missile, mel 200 aṭanga 3,400 chin kap pha siam, thawnchhuah leh enchhin an khap a ni. Mahse ram pahnihte hian he inremna siam hi ṭum eng emaw zat bawhchhe tawhah an inpuh tawn a ni. Russia military official chuan kumin May thla khan US chuan INF treaty in a khap, missile defence system-te chu a enchhin fo a, hei bakah hian missile pawh a siam reng bawk niin a lo puh tawh bawk.