US-in Jerusalem-a consulate general leh embassy chhunfin dawn

US chuan Jerusalem-a Palestinian chungchang bik ngaihtuahtu, a consulate general chu a embassy sawn luh thar nen a chhunfin dawn tih a sawi.

US Secretary of State Mike Pompeo chuan he thutlukna hi chhan ṭha tak neia siam a nih thu sawiin, hei hian Jerusalem, West Bank leh Gaza Strip chungchang a policy chu a tidanglam dawn lo tih a sawi.

Palestinian-te chuan US thil tum hi an sawisel nghal a, senior official Saeb Erekat chuan US President Trump-a kaihhruai sorkar chuan state pahnih siam tumna aiin Greater Israel siam a nih zawk theihnan Israel a thawhpui a ni, a ti.

Israel chuan Jerusalem chu hmanlai aṭanga a ram khawpui, ṭhendarh theih loh niin a ngai. Hetihlai hian Palestiniante chuan kum 1967 Middel East war-a Israel in a luahsak, East Jerusalem chu an khawpuiah an ngai thung a, Palestinian state a din hunah an khawpui tur a nih thu an sawi.

US chuan nikum December thla khan Israel khawpuiah Jerusalem a pawm thu puangin, kumin May thla khan Tel Aviv aṭangin a embassy pawh Jerusalem-ah hian a sawn a ni. US-in consulate general hi a embassy-a a chhunlut chuan, Palestinian chung-chang chu Israel-a US ambassador enkawlna hnuaiah a lut tawh dawn a ni. Hei hi Palestinian lam chuan amahni enhran leh dahhniam tumna angah an ngai thung.