Citizenship Bill duh loin pawl 40-in bandh huaihawt dawn

Assam-a pawl hrang hrang 40-te chuan Citizenship (Amendment) Bill 2016 duh lohna lantirin October 23 hian state pumah bandh huaihawt an tum.

Krishak Mukti Sangram Samiti (KMSS) leader Akhil Gogoi chuan bandh huaihawt a nih tur thu hi sawiin, Assam Jatiyatabadi Yuva Chatra Parishad (AJYCP) bakah pawl dang 40 pawhin an zawm dawn tih a sawi. Guwahati-a press conference a neihah, Akhil Gogoi chuan,"BJP chuan Assam mipuite chu an khawtlang, ram leh an innghahchhante chu humhalh sak an tiam avangin Assam-ah sorkarna an siam theih phah a ni. Mahse an thu lo tiamte chu sutin, tun­ah chuan a leilung fate min phiarru leh ta zawk a ni", a ti.

Assam-a BJP sorkar chuan constitutional amendment bill kaltlangin Hindu Bengali-te chu citizenship pek a tum a ni tiin Gogoi chuan a sawi. BJP telna Meghalaya sorkar cabinet chuan he bill dodal hi an remti tawh bawk niin a sawi. He bill hian Assam leilung fate a nghawng dawn avangin a tawp thlengin theihtawpa dodal zel an tum tih a sawi bawk.

Gogoi chuan November 17-a Citizenship Bill thlawpna lantira Hindu Bengali pawlten convention neih an rawtna pawh lo dang turin Assam sorkar chu a phut. Hindu Bengali-te hi convention neih phalsak a nih vaih chuan a nghawng ṭha lo tak a awm dawn a ni tiin a a vau lawk. Hindu Bengali pawlte chu RSS ten an thlawp tlat a, Assam-ah boruak tihchhiat an tum a ni, a ti.