Pemluh tumten US lam pan zel

Central America ram aṭanga US-a pemluh tuma a ruala kalte chuan Mexico chhim lam aṭangin US ramri lam an pan zui zel.

US chuan central America ramte chu US-a pemluh tumte hi lo dang a, an ram lama thawn kir leh turin alo ti tawh a ni. Mexico thuneitute chuan heng mite hi Mexico leh Guatemala ramri-a leiah lo dan an tum a, mahse an zinga tam tak chuan Suchiate lui aṭangin lawngin Mexico ram hi an lut a ni.

US-a pem tuma a ruala kalte hi mi 2,000 vel nia sawi an ni a, an zinga a tam zawk hi Honduras ram aṭanga kal niin, an rama retheihna leh tharum thawhna tlanchhiatsan an ni tih an sawi a, hmeichhia leh naupang pawh eng emaw zat an tel a ni. Hetihlai hian Mexico ramah luh tumin mi tam tak chu ramri bulah an tangkhang mek bawk. Mexico thuneitute chuan an zinga ṭhenkhat passport leh visa neite chu luh phalsak an nih tur thu an sawi.

President Donald Trump chuan US-a luh tuma kalte chu an rama kir leh turin a vau fo a, an kal lui a nih chuan US ramri te khara a vau bakah, an ram kaltlang phalsaktu ramte chu chhawmdawlna an pek ṭhin tihtawpsakahte a vau tel bawk. Pathianni khan a twitter-ah ramdang mi, danloa an rama luh tumte dang turin theihtawp an chhuah thu a sawi. Donald Trump hian a campaign lai aṭangin dan loa an rama pemlutte hi a lo sawisel fo tawh a, President a nih hnuah pawh ramri veng turin National Guard sipaite pawh a tir tawh bawk.