Khawvela sea-bridge sei ber hawng dawn

Khawvela tuipui chunga lei dawh sei ber, Hong Kong-Zhuhai-Macau Bridge chu vawiin hian hawn a ni dawn a, Nilaini aṭangin mipuite hman theih tur hawn ṭan a ni tawh dawn a ni.

Dollar tluklehdingawn 20 senga siam, km 55-a thui lei dawh hi kum 2016-a hawn tura tih a ni a, mahse ṭum eng emaw zat tihkhawtlai a ni. Vawiina lei hawnna inkhawm buatsaihah hian China President Xi Jinping chuan a hmanpui dawn a, Hong Kong leh Macau official eng emaw zat an tel bawk ang.

Hong Kong-Zhuhai-Macau Bridge hi khawvela sea bridge sei ber a nih bakah, lei dawh tawh zinga sei ber parukna a ni pha bawk. South China Sea-a Pearl River Delta khawchhak leh khawthlang lam inkalpawhna tura dawh a ni a, three-lane niin tuipui chungah km 22.9-a thui leh tui hnuaiah tunnel km 6.7 a awm bawk a ni.

Lei dawhna atan hian steel ton 400,000 zet hman a ni a, lirnghing magnitude 8 chin pawh dawl thei tura duan a ni. Lei dawh hian Hong Kong International Airport - Zuhai inkar kalna hun chu darkar 4 aṭangin minute 45 lekah a tlahniam dawn a, Kwai Chung Container Port (Hong Kong) leh Zhuhai inkara hun hman darkar 3 leh a chanve pawh darkar khat leh minute 15-ah a tlahniam bawk ang.