US-ah Covid-19 kai mtd 11 chuang awm tawh

United States (US) chu khawvela Covid-19 hri kai tamna leh hripui vanga thi tamna ber ram a la ni chhunzawm zel a, hri kai hi an la pung chak hle a, ni khatah hri kai hmuh chhuah thar mi 1,00,000 chuang an la ni chho reng a ni. 

Ram puma hri kai hmuh chhuah tawh hi mi maktaduai 11 an chuang tawh a, hripui vanga thi hi 2,46,210 awm tawhin, tun hnaiah chawh rualin ni k hatah hri vanga thi hi 900 chuang awm ang zela chhut a ni. Hri lengin ziaawm lam a pan theih loh avangin state hrang hrangten khuahkhirhna khauh zawk an siam thar leh hlawm. 

Sorkar chuan December thlaah vaccine dose maktaduai 20 sem chhuah theih beisei a nih thu a sawi a, mahse vaccine-te hi official approval pek an la ni hlawm lo thung. 

President Donald Trump chuan hri leng avangin ram pum inkharkhip puan a tum lo tih a sawi a, mahse state eng emaw zat chuan an state pual bika hman tur khuahkhirhna an siam thung a ni. 

Michigan leh Washington state-ah chuan tun hnaiah Covid-19 kai hi a let zetin an pung chho tawh a, Michigan governor Gretchen Whitmer chuan hri darh tur venga theihtawp chhuah a nih loh chuan coronavirus vanga thi hi kar khatah mi 1,000 chuang zel an awm thei mai dawn niin a sawi. Hei vang hian Governor chuan Michigan state-ah kar thum chhung atana inkharkhipna tur a puang a, intihhlimna hmunte khar vek tura tih an nih bakah,  high school leh college-te chu  on-site teaching tihtawp tir an ni a, restaurant-te pawh indoor dining tih khapsak an ni bawk. 

Washington-ah pawh Thawhṭanni tlai aṭangin khuahkhirhna kalpui a ni a, thla khat chhung a awh ang. 

State dang eng emaw zat pawhin khuahkhirhna hi an siam thar leh a, Minnesota-ah chuan bar leh restaurant-te chu zan dar 10 thleng bak hawn phal a ni lo a, Wisconsin leh Nevada mipuite chu  kar hnih chhung pawn chhuak lo turin  ngen an ni bawk. 

California, Oregon leh Washington state governor-te chuan pawimawh tawp a nih loh chuan mipuite chu zin chhuak lo tur leh, zin hawte pawh inkhunghrang zel turin an chah.

 New York-ah chuan zan dar 10 hnu lamah bar leh restaurant-te hawn khap a ni a, mi 10 aia tam punkhawm khap a ni bawk. 

Chicago-ah chuan mipuite pawn chhuak tam lo tura ngen niin, essential items zawrhna ni lote chu zan dar 11-ah inkhar vek tura tih an ni a, mi 10 aia tum awmkhawm phal a ni lo bawk.