US-in economy lama Russia hrekna tur a puang

Ukraine chungchanga an inepna kal zelah, US chuan economy lama Russia hrekna tur a puang.

US president Joe Biden chuan Russia hrekna tur hi puangin, Ukraine khawchhak lama Russia president Vladimir Putin-a'n chet a lak dan chuan Ukraine a run ṭan tih a tichiang a ni, a ti.

President Putin hian Ukraine aṭanga inlakhran duh, Donetsk leh Luhansk bialte chu independent state-ah a pawm thu kar tir lam khan puangin, heng bial pahnihah hian Russia sipaite a dah nghal a ni. Hei hi Biden chuan na taka chhangin, Ukraine ram chhunga mi ngei, ram hran anga puang tur hian Putin hian eng dikna nge neia a inhriat tiin a sawi hial.

Russia chetdan avangin Russian financial institution lian pahnih - VEB leh an military bank, defence deal buaipuitu Promsvyaza bank-te chu an hrek nghal tih US President chuan a sawi a, khawthlang ramten sum an pekna tur an danchah sak tih a sawi. "Khawthlang lam ram aṭangin sum an hmu thei tawh dawn lo a ni, a ti. Russia-in Ukraine a beihna hi a kalpui chhunzawm zel a nih chuan Russia commerial lender lian pahnih, Sberbank (SBER.MM) leh VTB (VTBR.MM)-te pawh hrekah a vau nghal a, hei bakah hian Russia ram mi pawimawh leh an chhungte hrekna pawh siam chhoh zel an tum tih a sawi bawk.

President Biden-a'n Executive Order a tihchhuahah, Donetsk leh Luhanska bialah hian US mite chu investment leh sumdawnna tihthar leh suma puihna an pek khapsak an ni.

European Union, Britain, Australia, Canada leh Japan pawhin Russia bank-te hrekna tur an siam tur thu an puang. EU chuan Ukraine khawchhak lama inlakhran duhtu pawlte puitu, bank-te chu blacklist-a dah a remti tawh a, Ukraine pawh debt market aṭanga paih a remti bawk.

Germany pawhin Russia sorkar hnuaia Gazprom hnen aṭanga gas a lakna, Nodrd Stem 2 pipeline chu a titawp bawk a, hei vang hian Euorpe-ah gas man a sang chho thuai thei tih Germany economy minister Robert Habeck chuan a sawi. Russia President hlui, Security Council-a deputy chairman ni mek Dmitry Medvedev pawhin gas man hi a letin a pungchho mai thei tih a sawi lawk bawk a ni. Russia chuan gas pipeline tihtawp hi a rei loh a beisei thu sawiin, ram dangte hnenah energy supply chhunzawm zel a tum tih a sawi.