Hong Kong mipuite Covid test nei vek turin thupek chhuah

Hong Kong sorkar chuan an ramin Covid-19 hri leng an do mek karah an ram mipui maktaduai 7.5 te chu Covid test nei vek turin thupek a tichhuak.

Chief Executive Carrie Lam chuan mipuite chuan March thla laihawl aṭangin thawh thumin test an nei ṭan dawn tih a sawi.

Hong Kong hian China "zero Covid" policy chu kalpui tum mah se, Omircon vartiant darh vangin hri kai an pung nasa a, hostipal leh quarantine facility-te pawh a lun thei hle a ni.

Khawvel ramdangte'n hri nena khawsak an tum mek laiin, China policy hian hma taka test neiha hri kai zawn chhuah bakah, contact tracing chipchiar zawk leh quarantine leh travel restriction khauh taka kalpui an tum a ni.

Carrie Lam chuan, "Tun thla khat aṭanga thla thum inkar hi hri leng dona kawnga hun pawimawh tak a ni dawn a ni," tiin "Hri leng darh chak tak hi Hong Kong sorkarin a dan theih piahlam a thleng tawh a ni," a ti.

Hong Kong-a chengte hian kar khat dan vel zelah PCR testing round thum an paltlang a ngai dawn a. Lam chuan test neih ṭan hun tur hi la sawilang lo mah se nitin maktaduai test thei turin an inbuatsaih tih a sawi. "Mipui maktaduai sarih vel an awm avangin test neihnan ni sarih chhung vel kan mamawh ang," tiin a sawi. Compulsory test an neih kar lakah mipuite chuan rapid antingen testing nitin an neih a ngai dawn bawk.

Mithiamte chuan mi ṭhahnem tak chu an inkhunghran a ngai dawn tih an sawi lawk a ni.

China chuan hri darh tur venna atan hian khawpui pumah inkharkhipna te a kalpui a, mahse hetiang chu Hong Kong-ah chuan kalpui ve theih a ni dawn lo tih Lam chuan a sawi.

Hri leng tirh aṭanga kum hnih chhung chu Hong Kong hi hri darh tur venna kawngah a hmalakna ṭha tak avangin fak a hlawh hman hle a, mahse hri inkaidarh awlsam tak Omicron variant darh avangin an inveng thei tawh bik lo a ni. Kum hnih liam ta chhung khan hri kai hmuh chhuah hi 12,650 leh thihpui mi 200 chuang awrh chauh awmin, khawpui dangte nena khaikhin chuan an tlem hle. Mahse kumin January thla aṭangin hri kai hi a let ngain an rawn pung chho tawh a ni.