Peru president lailawk a bâng

Peru president lailawk, Manuel Merino chuan sorkar laka lungawi loa nawrh huaihawt leh police-te innawr­naa nawrh huaihawt zinga pahnih an thih avang leh, hliam tuar eng emaw zat an awm avangin kar khat pawh thuneihna a chelh hmain Pathianni khan a bang leh nghal. 

Thamna laa puh a nih avanga Peru president a nihna aṭanga Martin Vizcarra paihthlak a nih hnuah Congress speaker hlui, Manuel Merino hi kar liam ta Thawhlehni khan President lailawk tan hian dah a ni. 

Hetih lai hian mi tam tak chuan President atana Merino dah a nih hi duh loin nawrh an huaihawt zui a, Inrinni liam ta zan khan nawrh huaihawtte leh security force-te innawr  buaiin buaina nasa tak a chhuak ta a ni. Security force-te silai hmehpuahah nawrh huaihawt zinga pahnih an thi a, mi 100 chuangin hliam an tuar bawk niin Peru National Human Rights coordinator chuan a sawi. 

Nawrh huaihawt leh security force-te inbeihna thleng avang President lailawk bakah, minister 12 pawh an ban phah a ni. 

Merino ban lawm hian Pathianni khan mi tam tak chu kawtthlerah chhuak khawmin, an  hnam puanzar vaiin kawng an zawh a ni. 

Hetih lai hian President thar tur hi legislator-te chuan an ngaihtuah nghal a, Left-wing legislator leh human rights defender Rocio Silva-Santistban chu interim presi­dent atan hian ruat ni mah se Congress-ah vote laknaah thlawptu a ngah tawk lo a,  vote hi lak nawn leh tum a ni.