SpaceX rocket hmangin Astronaut pali vansangah kap chhuak

US, Florida-a National Aero­nautics and Space Administration (NASA) field center hmingthang tak John F. Kennedy Space Center aṭangin NASA chuan a astro­naut pali chu nimin zing khan International Space Station (ISS)-a cham turin Space Exploration Technologies Corp (SpaceX) rocket hmangin a kap chhuak.

Astronaut pali zinga pathum chu American astronaut Michael Hopkins, Victor Glover leh Shan­non Walker-te an ni a, pakhat hi Japanese space agency (Jaxa) aṭangin astronaut Soichi Noguchi a ni. ISS-ah hian thla ruk cham turin an kal dawn a, heng mi palite hi SpaceX rocket a full-a vansanga mi an kahkai hmasa ber te an ni.

US President-elect Joe Biden chuan a twitter-ah NASA leh SpaceX te a lawmpuina thu a sawi nghal a, America leh Japan mipui­ten astronaut-te an zin­kawnga hlawhtling taka an kal theihna tura an duhsakna chu a zawm ve tih a sawi.