Afghanistan sipaiten Pakistan firfiak 152 that

Afghanistan interior affairs ministry tarlan danin Helmand province-a Afghanistan sipaiten beihpui an thlaknaah Pakistan firfiak 152 an that.

Chanchinthar lakhawmtute a kawmnaah, interior affairs ministry thupuangtu Tariq Arian chuan tunhnai khan Afghanistan sipaite chuan Taliban firfiakte  lakah beihpui an thlak a,  Helmand leh Kandahar province-ah hian Taliban firfiak 55 an that a, hei bakah hian Helmand province-ah hian Pakistan firfiak mi 152 an that tih Arian chuan a sawi bawk.

United Nations Security Council (UNSC) chuan Afghanistan-ah Pakistan firfiak 6,500 vel an awm thu leh, heng zinga a tam zawk chu Tehrik-e Taliban Pakistan (TTP) an nih thu a tarlang bawk. 

Analytical Support and Sanctions Monitoring Team-in report a tichhuahah Afghanistan-a firfiak pawl awm te hi ISIS, Al Qaida leh an thawhpuite a nih thu tarlan a ni a, firfiak pawl lian ber nia ngaih chu TTP-te hi an ni. 

Pakistan-a firfiaka chetna thleng ṭhin tam zawk pawh TTP pawlte thil tih a ni ṭhin a, TTP mi leh sa zinga Iraq-a firfiak pawl Islamic State zawm leh Levant-Khorasan (ISIL-K) pawl zawm an awm nual bawk a ni.