Britain PM Boris Johnson inkhung hrang

Britain prime minister Boris Johnson chu tun hnaia Covid-19 hri kai nen inhnimhnaihna a neih avangin a inkhung hrang.

Johnson hi a dinhmun chu a ṭhat thu Downing Street thupuangtu chuan a tarlang. Kar liam ta Ningani khan PM hian a chenna, 10 Downing Street-ah MP-te nen meeting an nei a, he meeting-a tel MP Lee Anderson chu Covid-19 symptom a neih avangin inringhlelin a in test a, hri a kai tih hriat chhuah a nih tak avangin Johnson pawh hi a inkhung ve nghal a ni. 

Johnson chuan ngaihtuah awm a nih loh thu leh a taksa lamah pawh harsatna a awm loh thu a sawi a, mahse hri kai nen inhnimhnaihna an neih avangin sorkar dan zawmin a inkhung hrang tih a sawi. A chenna in aṭangin hna a thawk chhunzawm rih dawn tih a sawi bawk. 

Johnson hi kumin March 27 khan Covid-19 a lo kai tawh a, London-a St Thomas' Hospital-ah enkawl niin, ni thum chhung chu ICU-dah a ni. Hri a kai tawh loh hnua hospital a chhuahsan hnuah prime minister country house, Chequers-ah kar khat chhung a inenkawl leh a, hemi hnu hian a dam ṭha pangngaiin a hna pawh a chhunzawm leh nghal a ni. 

Pathianni khan Britian-ah hian Covid-19 hri kai thar mi 24,962 an awm a, anni nen hian Britain-a hri kai tawh zawng zawng hi mi 13,69,318 an tling tawh a ni.