Israel-in East Jerusalem-ah in sak ṭan leh a tum

Israel chuan Palestinian ram a luah, East Jerusalem-a Juda-te chenna tur in sak ṭan leh a tum niin  settlement watchdog group, Peaca Now chuan a sawi. 

Peace Now chuan Israel Land Authority chuan an website-ah East Jerusalem-a Givat Hamatos hmuna in 1,200 chuang sakna turin Pathianni khan tender a tichhuak a ni, a ti. Tender an tihchhuah avang hian thla reilote hnuah in sak hi  an ṭan leh mai dawn nia a lan thu group thupuangtu, Brian Reeves chuan a sawi a ni. 

Thuchhuah an siamah, Peace Now chuan Israel hma lakna chu remna leh muanna a awm theihna tur kawng zawn mekna tihchhetu a ni tih sawiin,  Israel sorkar chu US President Donald Trump term a tawp hmaa remchang lo chuhah a puh a ni. Trump kaihhruai US sorkar hian  Israel policy-te a thlawp ṭhat avang leh, Israel-in Palestinian ram a luaha Juda-te chenna tur in a sak te chu a pawmpui avangin Palestinian official-te chuan an lo sawisel fo tawh ṭhin.

Palestinian hruaitute chuan Givat Hamatos hmuna in sak a nih chuan, Bethlehem khua leh East Jerusalem chhim lam aṭanga West Bank kalpawhna a dang dawn tih sawiin, "Israel sorkar policy chuan two-state solution siam tumna chu a tichhe zui zel a ni," tiin Palestinian President Mahmoud Abbas thupuangtu, Nabil Abu Rudeina chuan a sawi.  

US secretary of state Mike Pompeo chuan tun kar chhung hian Israel tlawhin, West Bank-a Israel-in in a sakna hmunte i a tlawh nghal dawn. Palestinian ram luaha Israel sorkarin in a sakna hmun hi a hmaa US secretary of state-te chuan an tlawh duh ngai lo a ni. 

West Bank-ah Juda mi nuai nga vel leh, East Jerusalem-ah nuai 2.2 chuang an cheng mek tawh. Palestinian-te chuan kum 1967 indo ṭuma Israel-in an ram a laksak - West Bank, Gaza Strip leh East Jerusalem-ah chuan Palestinian ram din an tum a, mahse Israel-in a ram luahah Juda-te chenna a sak  belh zel avangin Palestinian ram an din tumna pawh a harsa chho zel tawh niin an sawi.