Russia-in Ukraine ram a run ṭan ta ; Ukraine khawpui liante missile-in a kap
Khawthlang ram hrang hrangte an lo hlauhthawn lawk ang ngeiin, nimin khan Russia chuan khawmual, boruak leh tuipui aṭangin Ukraine ram a bei ṭan a, Indopui II hnua Europe-a ram inbeihna lian ber a tling nghal a ni.
Russia chuan Ukraine khawpui hrang hrangte chu missile-in a kap a, Ukraine khawchhak lam Chernihiv, Kharkiv leh Luthansk bial ramri-ah Russia sipai tam tak lutin, tuipui lam aṭangin Ukraine chhim lam Odessa leh Mariupol khawpuiahte sipai an lut bawk.
Nimin khawvar hma deuh khan Ukraine khawpui, Kyiv-ah bomb puak rite pawh hriat a ni a, khawpui chhunga airport lian ber bulah silai kah rite hriat niin, khawpui chhungah siren tihrik a ni.
President Putin-a'n beihpui thlak turin sipaite thu a pe
Nimin zinga TV-a thu a sawiah, Russia president Vladimir Putin chuan Ukraine khawchhak lam, Donbas bialah an sipaite chu beihpui thlak tura thu a pek thu a puang. He biala Ukraine sipaite chu an ralthuamte dah thla a, in lama haw turin a ti. Buaina neih mekah ram dangte an inrawlh a nih chuan Russia chuan a chhang leh nghal dawn tih a sawi. An sipaite beihpui thlak chu invenhimna atana ti an nih thu leh, Russia chuan Ukraine ram luah leh awp tumna a neih loh thu a sawi.
President Putin chuan modern Ukraine aṭanga vauna an tawh fo avangin Russia chu a him lo tih a sawi. Thisen chhuahna a thleng a nih pawhin Ukraine-a rorellai vanga thleng a nih tur thu a sawi bawk.
Russia-in Ukraine a ngai theih lohna chhan eng nge?
Russia hian Eurpoean institution, NATO leh EU-a Soviet Union kehdarh ram zinga mi, Ukraine ram intahluh tumna hi a ngaithei lo hle. President Putin chuan Ukraine chu khawthlang ramten an duh ang anga an thunun, state dik tak pawh ni tawh lo ni hialin a lo sawi tawh a ni.
Khawthlang ram leh Ukraine ramte hnenah hian NATO-ah Ukraine telh a nih loh tur thu tiam turin a phut.
Russia leh Ukraine-te sipai leh ralthuam neih dan
Ukraine President-in martial law puang
Ukraine president Volodymyr Zelensky chuan nimin vek khan an ram pumah martial law a puang nghal a, Russia chuan military infrastructure-te bitum a tum tih a sawi. Ukraine mipuite chu pawn chhuak lo turin a ngen a, hemi rual hian chiai lo turin a chah nghal bawk.
President Zelensky chuan Donbas bialah Russia sipaiten beihpui an thlak mek thu leh, military infrastructure leh border guard-te an beih thute, khawpui hrang hrangah bomb puak rite hriat a nih thu a sawi. Hei hi awmze nei loa inrunna a ni, a ti.
Ukraine media-te chuan an ram khawpui, Kyiv leh khawchhak lama Kharvik khawpuia military command centre-te chu missile hmanga kah a nih thu an sawi. Russia sipaite hian Belarus puihnain, Belarus ram aṭangin Ukraine hi an bei tel bawk niin Ukraine border guard service chuan a sawi.
Russia-in a beih tak avangin Ukraine khawpui, Kyiv-a cheng mi tam tak chu tlanchhiat an tum a, nimin zing aṭangin khawpui chhunga traffic a jam nasa nghal hle. Ukraine state air traffic service chuan nimin khan an rama airspace-te a khar nghal a, civil aviation lam himna atan flight zawng zawng pawh tihtawp a ni tih a sawi.
EU-in Russia hrekna siam dawn
European Union hruaitute chuan Russia hrekna tur an siam thar leh dawn tih sawiin, EU rama a thil neihte khawih chet theih loha dah te, European financial market-a a bank neihte khawih theih lohin a hrek dawn.
Russia-in Ukraine a beih hnuah nimin khan EU hian emergency summit an nei nghal a ni.
European Commission hotu Ursula von der Leyen chuan President Putin chu Europe-a indona thlentir turah puhin, EU chuan mawphurtuah a ngai a ni, a ti. A thiltih avangin Russia hi an theih angin an hrek dawn a, Russia economic base pawhin a tlakhniam phah dawn tih a sawi.
US leh a thawhpuiten Russia hi a chhang ngei dawn : Joe Biden
US president Joe Biden chuan Russia-in sipai chakna hmanga dik lo taka Ukraine a beihna chu US leh a thurualpui ramte chuan an chhang ngei dawn a ni, a ti.
Ukraine rama mihring thihna leh chhiatna thlen chhanah Russia chauh chu mawhphurtu a ni tiin, khawvelin Russia vangah an puh zel ang, tiin President Biden chuan a sawi. US leh a thurualpui ramten Russia an hrekna tur pawh an puang thuai dawn tih a sawi bawk.