US trucker-ten Covid-19 khuahkhirhna duh lohna lantir ve leh

United States-a truck khalhtu pawlte chuan Nilaini aṭang khan California aṭangin Washington lam panin, sorkarin Covid-19 chungchanga khuahkhirhna an siam duh lohna lantirnan an lirthei hmangin kawng an zawh.

US trucker-te hian 'People's Convoy' tih hmangin lungawi lohna hi an lantir a, February 23 khan California aṭangin nawrh hi an huaihawt ṭan a ni. Lungawi lohna lantirtute hian sorkarin mask vuah leh, vaccine la ngei ngei tura thupek a siam chu tihtawp an phut a ni. Hei bakah Covid-19 hri leng vanga US sorkarin politician-te hnena inkhuahkhirhnate siam thei tura emergency power a pek chu tihtawp an phut bawk.

California aṭang hian truck ke 18 nei, 20 chuang chu Washington panin an kal a, hmun hrang hrang ṭangin truck dangten an rawn zawm ang. March 5-ah People's Convoy hian Washington an thlen rin a ni. Nawrh huaihawttu zinga mi, Brian Base chuan Washington khawpui chhung lut thei lo tura dan an ni maithei tih a sawi a, mahse an thil phut tihhlawhtlin a nih hma chuan nawrh tihtawp an tum lo tih a sawi.

Pentagon pawh People's Convoy-in Washington an rawn luh hun atan lo inbuatsaih nghalin, February 26 - March 7 chhunga traffic pui turin National Guard 400 chuang ruat rawtna pawh a pawm tawh. Mahse sipaite hian silai an keng dawn lo a ni. Hei bakah hian traffic post-a tactical vehicle 50 dah pawh a remti bawk. Heng bakah hian Washington pawnah a ṭul huna koh theih mai turin National Guard sipai 300 dah an ni bawk ang.