Khashoggi case: Turkey-in thu dik tak puanchhuah tum

Turkey President Recep Tayyip Erdogan chuan Istanbul-a Saudi consulate-a Saudi journalist Jamal Khashoggi thah a nih dan dik tak chu puanchhuah a tiam.

Turkey official-te chuan October 2 khan Khashoggi hi Saudi consulate chhungah Saudi agent-ten an that niin an sawi a, a finfiahna pawh an nei tih an sawi. Saudi lam chuan Khashoggi thah nia sawi chungchang hi hun rei tak a phat hunah, consulate chhunga intibuaina thlengah a thi tih a sawi ve leh ta a ni.

Saudi Arabia sorkar kalphung sawisel ṭhintu, Jamal Khashoggi hi Istanbul, Turkey-a Saudi consulate-ah October 2 khan a nupui neihna tur atana lehkha pawimawhte la turin a kal a, mahse hemi hnu hian a chin hriat zui a ni ta lo a ni. Turkey chuan consulate chhungah Saudi sorkar tirh Saudi agent-ten an that niin a sawi a ni.

Saudi Arabia-in consulate chhunga intihbuaina thlengah Khashoggi a thi tih a puan hnuah ram hrang hrangte chuan an dem thu sawiin, a thih dan chhui chian an phut thu an sawi nghal a ni. Hetihlai hian Saudi hruaitute chuan consulate chhunga thil thleng chungchang hi an hriatpui loh thu sawiin, he tualthahna thlenga inhnamhnawihte chu chhui chhuah a, hremna pek ngei an tum thu Foreign Minister Adel al-Jubeir chuan a sawi. Khashoggi thah a nih chu thil dik lo tak a ni a, hei bakah tualthattu ten an thil tihsual thup bo an tum pawh chu thil dik lo a ni, a ti. Khashoggi ruang awmna hi an hriat loh thu a sawi bawk.

Khashoggi thahna kaihhnawihah hian Saudia Arabia chuan mi 18 a man tawh a, official pahnih a ban tawh bawk a ni.

Saudi consulate-a inthahna thleng vang leh, hemi chungchang Saudi-in hun rei tak a zep avanga lungawi lo in, nimin aṭanga Riyadh-a neih ṭan, Future Investment Initiative aṭangin mi 40 vel chu an inhnukdawk a ni.