Trump-an nuclear ralthuam neih belhah vau

US President Donald Trump chuan ram dangten an ngaihtuahna fim taka an hmang lo a nih chuan United States chuan a nuclear ralthuam neih zat chu tipung zel dawn a ni, a ti.

He thu hi Russia nenna missile chungchanga khuahkhirhna siamna, Intermediate-Range Nuclear Forces (INF) treaty aṭanga US a inhnuhdawh tur chu a sawi hnu lawkah Trump hian a sawichhuak a ni. Trump chuan inremna an lo siam tawh hi Russia chuan vawi tam tak a bawhchhe tawh niin a sawi bawk. He inremna an siam hi kum hnih hnua tawp tur a ni.

Trump chuan White House-a reporter-te a kawmnaah, "Nuclear arsenal hi kan siam mai dawn a ni. Ramdangten ngaihtuahna dik tak an neih hma chuan - Russia hian he inremna hi a zawm lo a, hei hi kum eng emaw zat kaltaa lo tih tawh tur a ni. Midang aiin pawisa kan ngah zawk a, ngaihtuahna fim tak an hman hma chuan kan siam zel mai ang" a ti. An ngaihtuahna fim taka an hman hunah an ralthuam siam chu an titawp mai ang a, tihtawp bakah ralthuam neih zat pawh an titlem nghal mai dawn niin Trump chuan a sawi.

Hetihlai hian California Senator Dianne Feinstein chuan INF treaty aṭanga US inhnuhdawk chu thil tihsual lian tak a ni dawn tih sawiin, hei hian national security thlengin a tihchak loh phah dawn a ni, a ti. Cold War lai aṭangin he inremna siam vang hian nucelar rlathuam hlauhawm tak khap a ni a, hei hian nuclear war a thlen hlauhthawnna pawh a tihnep phah niin a sawi thung.