Russia sipaite'n Kyiv an pan, Ukraine hotu-in ramdangte ṭanpuina ngen

Russia-in Ukraine a run ni hnihna, nimin khan Russia sipaite chuan Ukraine khawpui Kyiv an pan a, hetih lai hian Ukraine president Volodymyr Zelenskiy chuan ram dangte puihna ngeiin, Russia laka hrekna siam ringawt chu a tawk zo lo tih a sawi.

Russia president Vladimir Putin thupekin Ningani khan Russia sipaite chuan khawmual, boruak leh tuipui aṭangin Ukraine hi an run ṭan a, khawpui hrang hrangte an bei nghal a ni. Russia sipaite beihna avang hian khawpui liana cheng mi nuai khat chuang zet chu himna zawngin an tlanchhe tawh nia sawi a ni. Ningania Russia-in a beihnaah khan Ukraine civil leh sipai 137 an thi niin President Zelenskiy chuan a sawi bawk.

Belarus ramri aṭangin Russia sipaite hian Kyiv hi an pan a, Kyiv hmarlama Chernobyl nuclear power plant hlui pawh an la tawh a ni. Russia defence ministry chuan Ukraine-a nationalist group leh firfiak pawlte chuan pawikhawihna thlenna atana an hman theih lohna tura an sipaite chuan he plant hi an venghim tih a sawi.

Russia sipai lamin tam hneh viau mah se Ukraine sipaite chuan hmun paliah an khawpuia Russia sipaite lut tur hi an lo veng ve mek bawk. Hetih lai hian nimin tlai lam khan Russia sipaite hian Kyiv khawpui hmarlama district an thleng tawh nia sawi a ni a, Russian tank tlan lutte pawh hmuh tur an awm tawh a ni.

US leh Ukraine official-te chuan Russia hian Kyiv khawpui hi lak a, Ukraine sorkar paihthlak chu a tum tih an sawi. President Putin chuan Ukraine sorkar chu US-in a duh ang anga a thunun theih tiin na takin a lo sawisel fo tawh a ni.

Ukraine sipaite chuan nimin zingah khan Kyiv khawpui chhunga Russia aircraft thlawk chu an kap thla a, mihring chenna inah tlain a kang zui tih interior minister adviser Anton Herashchenko chuan a sawi. He missile hi mihring khalh nge, mihring khalh ngai lo chi tih erawh sawichian a ni lo.

Foreign Minister Dmytro Kuleba chuan an ram khawpuiin hetianga beihna a tawh hnuhnun ber chu kum 1941-a Nazi Germany-ten an beih kha a nih thu a sawi.