Ukraine army-ah inpe turin ngen

Ukraine Defence Force chuan nimin khan thuchhuah siamin, an rama civil mite chu Ukraine army zawm turin a sawm a, kum bithliah a awm lo a, kum tling lo pawh an pawm vek tih a sawi.

He thuchuah hi Commander of Troops, Yuri Galushkin hminga tihchhuah a ni a, "Ukraine hian a mamawh vek cheu a ni. A kalphung pawh awlsam taka siam niin, passport leh identification number chiah a ngai a ni. Kum bithliah a awm lo," tiin inziahluhna lama harsatna nei an awm chuan official lamah hriattir turin a ti a ni.

Russia-a indo duh lohna lantirtu mi 700 chuang man
Russia-in Ukraine a beih hnuah, Ningani khan Russia ram khawpui hrang hrangah indo duh lohna lantir a ni nghal a, an zingah mi 700 chuang chu man an ni tawh.

Central Moscow-a Pushkin Square-ah mi 2,000 vel an pungkhawm a, kalkhawmte hian 'Indo kan duh lo' tih thute an aurualpui a ni. Saint Petersburg-ah pawh mi 1,000 chuang an pungkhawm bawk. Khawpui dangah pawh lungawi lohna hi lantir a ni bawk a, police-te chuan pungkhawmte hi hnawtdarhin an zinga mi tam tak chu an man zui a ni.

Russian activist-te chuan social media lamah indo duh lohna lantir tur hian mipuite an sawm a ni. Hetih lai hian thuneitute chuan indo duh loh zawnga chhuak khawm lo turin a lo vau zui ve nghal bawk.