US-in Saudi official-te visa sût sak

United States chuan Saudi journalist Jamal Khashoggi thahnaa inhnamhnawiha puh, Saudi official-te visa chu a sût sak.

Saudi Arabia chuan The Washington Post contributor, journalist Khashoggi hi Istanbul-a Saudi consulate-ah thah a ni tih a sawichiang tawh a ni.

US chuan Khashoggi thah a nih dan kimchang hriat a tum a, Congress pawh a berawn tawh a, he tualthahnaa thlenga inhnamhnawihte hrem an nih ngei theihna turin ramdangte pawh a thawhpui zel dawn tih Secretary of State Mike Pompeo chuan a sawi. Information an dawn tawh bawhzuiin, US hian official ṭhenkhat chungah hian hma a la zui nghal a ni.

Khashoggi thahnaa inhnamhnawiha puh zingah hian Saudi intelligence service, Royal Court, Saudi foreign ministry leh ministry danga official-te an tel niin Pompeo chuan a sawi. Heng mite hriatchian tawhte visa chu sût sak an ni tih sawiin, hrekna dang siam dan tur pawh Treasury Department nen an ngaihtuah mek tih a sawi. Turkey President Recep Tayyip Erdogan pawhin an ram chhunga inthahna thleng chu a hma

aṭanga lo ruahman lawk vek a ni tiin, he thila inhnamhnawihte chu hremna na tak pek vek a phut tih a sawi.

Hetihlai hian Saudi Arabia lal King Salman leh Crown Prince Mohammed bin Salman te chuan Thawhlehni khan Riyadh-a Yamama Palace-ah Khashoggi chhungte hi hmuin, an tawrhpui thu an hrilh. Hei hi mi tam tak chuan sawiselin, khawvel laka an hming tihṭhat tuma thiltih mai niin an sawi thung.

Saudi Crown Prince Mohammed chuan Khashoggi thahnaah hian inhnamhnawiha a nei lo tih sawiin, he tualthahnaa inrawlha rinhlelh mi 18 man an ni tawh tih a sawi. Saudi Energy Minister Khalid al-Falih pawhin Khashoggi chunga thleng chu thil rapthlak tak a ni tiin, Saudi mipuite pawhin hrehawm an ti takzet a ni, a ti.