Israel-in AIDS damdawi thar siamna tur din dawn

Israel chuan an ram chhim lama Eilat khuaah AIDS damdawi thar siamna tur, biotechnology plant hmasa ber a siam dawn tih Ministry of Economy chuan a sawi.

Damdawi siam thar, 'Gam-mora' tih hi Israel pharma-ceutical company, Zion Medical siam a ni a, mihringah hlawhtling taka enchhin a lo ni tawh bawk. He damdawi thar an enchhinnaah hian cancer bawk enkawlna atan pawh a ṭha hle tih hmuhchhuah a ni bawk.

Damdawi siamchhuah thar hian a damdawi hmasa virus chauh tihbo theite ang loin, HIV-virus kaina cell a tibo thei dawn a ni. Municipality of Eilat chuan he damdawi zirchian leh enchhina tur bakah, plant siamna tur ram a pe a ni.

Development center siamna atan hian US dollar makaduai 30 ruahman a ni ang a, heng zinga dollar maktaduai 9 chu ministry in a tum ang. Hei bakah hian plant siamna tur atan hian dollar maktaduai 90 sen a ngai bawk ang.