Cuba trade fair-ah company 60 chuang tel dawn

Cuba khawpui, Havana-ah October 29 - November 2 chhung hian Havana International Trade Fair (FIHAV 2018) neih a ni dawn a, he hunah hian khawvel ram hrang hrang aṭagin company 60 chuang an tel dawn.

Foreign Trade and Investments Minister Rodrigo Malmierca chuan trade far-ah hian high-level official 20, chambers of commerce 30 bakah ramdang aiawh 2,500 zetin an tel theih tur an tichiang tawh tih a sawi. US company 16 pawh an tel dawn tih sawiin, heng zingah hian tunhnaia din thar US-Cuba biotechnology joint venture, Innovative Immunotherapy Alliance S.A pawh a tel ang. Hei hi Cuba-a Mariel Special Development Zone (ZEDM)-ah hmunpui nei niin, therapeutic anti-cancer vaccine siamtu a ni.

Malmierca chuan US Presi-dent Donald Trump-an tunhnaiah Cuba ram hrekna siam leh mah se, he fair-a ram hrang hrang company ten tel an tum thu an sawi chuan Cuba ram an thlawpna lantirna a ni, a ti. Fair neih chhung hian Russia-latin American leh Caribbean Business Forum pawh neih nghal a ni dawn bawk. Official-ten an chhut danin, Caribbean ramte hian hmasawnna ngelnghet nei tur chuan kumtin US dollar tluklehdingawn 2.5 tal investment an hmuh a ngai a ni.

Havana International Trade Fair hi Cuba rama forum pawi-mawh ber leh, Latin America leh Caribbean-a a pawimawh ber zinga ngaih a ni ṭhin.