Russia sipaite Ukraine khawpui lian pahnihna Kharkiv-ah an lut

Russia-in Ukraine ram a run mekah, Russia sipaite chu nimin khan Ukraine ram khawpui lian pahnihna, hmarchhak lama Kharkiv khawpui chhungah an lut tawh tih tualchhung official-te chuan an sawi.

Regional governor Oleh Sinegubov chuan Russia sipai motorte chu khawpui chhungah tlan lutin, khawpui laili laiah pawh an awm tawh tih a sawi. Hemi rual hian Ukraine sipaite chuan an hmelmate hi theihtawpa an lo beih let thu sawiin, he khawpuia civil mite chu pawn chhuak lo tura hrilh an ni, a ti.

Ukraine State Service of Special Communications and Information Protection in video a tichhuahah, Kharkiv khawpui chhung kawtthlera Russia sipai motor tlan laite leh, tank kang laite an tilang a ni.

Russia chuan a sipaite chuan Ukraine chhim lama Kherson khapwui leh, chhimchhak lama Berdyansk khawpui pawh an la tawh tih a sawi. Russia defence ministry thupuangtu Igor Konashenkov chuan, "Darkar 24 liam ta chhung khan Russian armed force-te chuan Kherson leh Berdyanks khawpui pahnihte kalpawhnate chu an dangchat vek tawh a ni," a ti.

Hetih lai hian Ukraine chuan an sipaiten Belarus aṭanga Russia-in Tu-22 strategic bomber-in cruise missile a kahchhuah chu an lo kapthla tih an sawi vek bawk.

Germany-in Ukraine hnenah ralthuam thawn dawn
Germany Chancellor Olaf Scholz chuan Ukraine hnenah direct-in ralthuam an thawn dawn tih a sawi.

Olaf Scholz chuan anti-tank weapon 1,000 leh Stinger missile 500 an thawn dawn tih a sawi. Hei bakah hian German siam ralthuamte inbeihna hmuna thawn chungchanga khuahkhirhna a siam pawh a titawp ṭhen a, hei vang hian ram dang pawhin Ukraine tan hian German siam ralthuam an thawn thei tawh dawn bawk a ni.

Foreign miniser Annalena Baebock chuan, "Putin-a'n indo a chawh chhuah hnuah kan khawvel hi a danglam ta vek a ni. Hetianga international law bawhchhiat a ni hi pawi kan tih rualin, che thei lo bik erawh kan ni lo. Hei vang hian an ram tana beitu, Ukraine sipaite chu anti-tank leh Stinger missile hmangin kan pui ve dawn a ni," a ti.