UK: Bexit deal-in House of Commons a paltlang ta

European Union(EU) aṭanga Britain inlakchhuahna tur European Union Withdra­wal Bill  (Brexit Withdrawal Agreement Bill) chu Ningani khan an ram parliament lower chamber House of Commons-ah pawm a ni ta.

Bill duh lamah hian vote 330 a tla a , a duh lo lamah 231 tla thungin Brexit deal hnuai­ah hian January thla chhung ngei hian Britain chu EU aṭanga inlakchhuah fel tum a ni. Brexit chungchang hi kum thum zet chu buaipui a ni tawh a, House of Commons MP-te'n an pawm ta bawk a, parliament upper chamber House of Lords-ah kar lehah hian ngaihtuah a ni ang.

House of Lords-ah hi chuan pawm thuai a nih rin a ni a, sawiselna tam loin an pawm rin a ni a, karleh chhung hi chuan 'dan' ah an chantir hman beisei a ni. Brexit Secretary Stephen Barclay chuan House of Lords politician-te chuan House of Commons duhdan chu an hmuhchian a rin thu sawiin, a paltlang ngei a beisei tih a sawi. 

Britain hi Brexit vang hian a buai rei tawh hle a, nikum December 12-a prime minister Boris Johnson-a'n inthlan a sawnhmaa hnehna a chan hnu kha chuan Brexit deal hi a tlang ngei rinna a sang tawh a, tun thla tawpah hi chuan EU aṭangin Britain hi a inlachhuak tawh dawn niin a lang.