Rohingya Muslim-te beih chhunzawm reng an ni : UN

United Nations fact-finding team chuan Security Council-a report a thehluhah Myanmar-a Rohingya Muslim-te chu beih chhunzawm reng an la ni tih sawiin, hemi chungchang hi International Criminal Court-ah thlen turin a ngen.

UN Fact-Finding Mission on Myanmar chairman Marzuki Darusman chuan press conference a neihah, Rohingya mite hi thah an la ni reng a, hei bakah hian an pung zel tur venna atan nau neih khapsak te an ni tiin, mi tam tak chu camp-ah an la khawsa reng niin a sawi. Mipuite suat hna hi kalpui chhunzawm reng a ni, a ti.

Fact-finding team report siam hi phek 444 zeta chhah a ni a, Security Council hnenah Myanmar chungchang chu The Hague-a International Criminal Court-ah emaw, adhoc international criminal tribunal-ah emaw thlen turin a ngen.

Report-ah hian Myanmar sipai hotu Commander-in-Chief Min Aung Hlaing telin general te chu Rakhine State-ah insuatna nasa tak thleng chungchangah chhui chian a, thubuai siamsak an phut thu an tarlang bawk.

Hetihlai hian Myanmar chuan UN report hi a pawm lo tih sawiin a rintlak tawk loah a ngai tih a sawi a, Rakhine state-a thil thleng chhui tur hian Asian diplomat-te awmna independent investigative commission a din thu a sawi.