China-in Taiwan leh South China Sea venhim zel tum

China chuan a ram china a chhiar, Taiwan leh ram dangte nen neitu nihna an inchuh mek, South China Sea chu an ram lak aṭanga lakhran a remti dawn lo a, ram inches khat pawh chan a tum lo tih sawiin venhim zel a tum thu a sawi.

China Defence Minister Wei Fenghe chuan nimina Beijing-a Xiangshan Forum hawnna inkhawmah he thu hi sawiin, "China lak aṭanga Taiwan lakhran tum an awm a nih chuan, China sipaite chuan action an la nghal dawn a ni", a ti. China leh US sipaite inzawmna chu thil pawimawh tak leh venthawn ngai tak a ni tih a sawi a, hemi rual hial hian South China Sea-a pawn lam sipaite inrawlh chu China chuan a dodal zel dawn a ni, a ti.

Tun hnaia US-in China sipaite hrekna a siam avang te, US-in Taiwan a thlawp avang te leh South China Sea-a US sipaite awmdante avangin China hi a lungawi lo hle a ni. Hei vang hian khawvela economy lian ber ram pahnihte inkarah inhriatthiam lohna leh inepna awmte siamṭha a, buaina chhuak mai thei pumpelh turin inzawmna nghet leh thuk zawk an neih a ngaih thu US Defence Secretary James Mattis chuan China Foreign minister a lo hrilh tawh a ni.

Hetihlai hian US military commander hlui chuan US leh China chu kum 15 hnu velah chuan an indo mai a rinawm thu a sawi. Lieutenant-General Ben Hodges (rtd) chuan US chuan Pacific-a invenhimna lam a ngaih pawimawh a ngaih thu a sawi.