Israel-in missile-in Gaza kap

Gaza Strip aṭanga rocket hmanga Israel chhim lam an beih chhanlet nan, nimin zing khan Israel fighter jet-te chuan missile-in Gaza-a Hamas firfiak pawlte hmun eng emaw zat an kap.

Israel indo thlawhtheihnate hian Gaza Strip chhim lam leh hmar lama Hamas armed wing post leh hmun pawimawh eng emaw zat an kap fuh nia sawi a ni a, mahse thi leh hliam erawh report a awm lo.

Nilaini zan khan Gaza Strip aṭanga rocket kahchhuah pakhat chuan Israel ram a fuh a, rocket dang pakhat chu Israel sipai Iron Dome-in a lo kapthla a ni. Hemi hnu lawkah hian Israel sipaite hian Gaza Strip hi an bei zui ve nghal a ni.

Gaza Strip-ah hian Nilaini khan Egypt security intelligence palai chuan Hamas hruaitute bakah Palestinian pawl dang hruaitute meeting a neihpui a, Israel nena inremna siam theih dan turte sawipuiin, Palestinian President Mahmoud Abbas-a pawl, Fatah movement nena thawhho dan turte a sawipui a ni.

Gaza Strip chhim lam, Israel nena an inri-na bula Israel laka lungawi lohna lantira Palestinian pungkhawmte leh Israel sipaite innawrnaah, Israel sipaite silai hmehpuahah Palestinian mi pariatin hliam an tuar avangin Gaza Strip-ah hian buaina hi a punlun chho leh a ni. Nilaini zing khan Israel drone-te chuan Gaza Strip khawchhak lam leh Israel inrina bula Hamas post chu ṭum hnih an kap bawk. Israel sipai thupuangtu chuan an beih chhan hi Palestinian-ten Gaza Strip aṭanga Israel ram chhunga balloon hal an chhuah vang niin a sawi.

Kumin March 30 aṭanga ramri-a Israel laka lungawi lohna lantir a nih aṭang khan buaina chhuakah Palestinian mi 200 chuang an thi tawh a, mi 22,000 velin hliam an tuar bawk.