US-in ramri-ah sipai 800 dah dawn

US leh Mexico ramri kaltlanga US-a pem luh tumte lo dang turin US chuan ramri-a duty tur hian sipai 800 a tir dawn nia sawi a ni.

Central America aṭangin Mexico kaltlanga US-a pemlut tumin a rualin mi tam takin ramri lam hi an pan mek a, US President Donald Trump chuan heng mite hi lo dang a, an rama hruai kir leh turin Guatelama, El Salvador leh Honduras ramte chu alo hrilh tawh a, an dang lo a nih chuan US-in chhawmdawlna a pek ṭhin pawh tihtawpah a vau a ni.

Mahse pem luh tumte hian US hi an panlui zel a ni. Hei vang hian President Trump chuan ramri-a lo dang turin sipaite dah an tum tih sawiin, a ngenna angin Defence Secretary James Mattis chuan sipai 800 vel tirh a tum a ni. Ramri-a sipai tirh turte hi National Guard nge military force tih erawh sawichian a ni lo.

Mexico ramri-ah hian border official-te pui tur hian National Guard sipai sang tel dah an ni tawh a, unarmed tropp 2,100 an awm mek a, mahse Pentagon chuan sipai 4,000 thleng dah a phalsak a ni.

President hlui Barack Obama khan ramri veng tur hian sipai 1,200 a lo dah tawh a, George W Bush khan Operaton Jum Start neihnaa Border Patrol pui tur hian sipai 6,000 zet a lo dah tawh bawk.

US-a pemluh tuma a ruala kalte hian Mexico-a Chiapas state-a Mapastepec khaw bul an thleng tawh a, Pijijiapam khua an pan leh dawn a ni. Mahse US ramri thleng tur chuan kar eng emaw zat an la kal a ngai a ni.

United Nations chuan a ruala US pana kalte hi October 22 khan mi 7,000 chuang an tling tawh niin a sawi. Heng mite hi a tam zawk chu Guatelama, Honduras leh El Salvador aṭanga kal an ni a, an rama intihduhdahna, retheihna leh tharum thawhna te an tlanchhiatsan niin an sawi.

President Trump chuan Ningani khan a twitter-ah pemluh tumte chu US pan lo turin a ti leh a, US-ah dan loin mi tumah luh an remti dawn lo tih a sawi. An ramah kir leh a, midangte tih dan ang bawka citizenship dil mai turin a ti a ni.