Myanmar journalist-te bail-in chhuahtir

Myanmar journalist pathum, inhuatna chawk chhuak thei zawnga thu chhuaha puha mante chu nimin khan bail-a chhuahtir an ni.

Journalist pathumte hi Myanmar rama private newspaper lian ber, Eleven Media chief reporter Pyo Wai Win, leh editor pahnih Kyaw Zaw Lin leh Nayi Min te an ni a, sorkar sum hmandan chungchang sawisel zawnga thu an chhuah avangin Yangon regional government chuan complaint a thehlut a, October 10 khan man niin thubuai siamsak an ni a, Insein tanin-ah tantir an ni.

Judge Tin War War Thein chuan journalist-te hi an ram himna atana hlauhawm an ni lo tih sawiin, an tlanbo dawn lo a, hei vang hian bail-a chhuah phalsak tih a sawi. An thubuai hi November 9 hian ngaihtuah a ni leh dawn a, an thubuaiah hian thiam loh chantir an nih chuan a rei berah kum hnih tantir theih an ni.

Myanmar ramah hian kum 2016-a Aun San Suu Kyi-i kaihhruai sorkar a a din hnuah journalist 38 zet chu thubuai siamsak an ni tawh niin freedom of expression group Athan chuan a sawi. Thla hmasa khan Reuters reporter pahnih chu Official Secrets Act palzutah puhin kum sarih tang tura hrem an lo ni tawh a ni.